Konstepaasje, wat opsjtopping beteikent, maak al sinds '96 Limburgstalige punk.
Konstepaasje is ontsjtange door Jo (gitaar) en Zef (Bas) tijdes het Dynamo Open Air festival van 24-25-26 mei 1996 (RIP). Robert (drum) voegde zich toe aan de band wodoor Konstepaasje een feit woor. Noa enkele optraejes blik dat Konstepaasje baeter af is mit 'ne "losse" zenger en in april '97 weurt dat Huub. Eind '97 numme ze hunne jetste cassette-demo "Sjtik!" op dae begin '98 good versjpreid weurt. Ouch komme d'r 2 nummers ("Sjovie" en "Sjtik de Moard") op de verzamelaer "Groetjes uit Holland" van ut Duutsje punklabel Vitaminepillen.
Noa de zomer van '99 weurt Konstepaasje vergezeld door René (gitaar) wat resulteert in de cd "Sjiet Egaal" dae in december 2000 oetkump en un live-cd in mei 2001 getiteld "Sjtront oppe buun" welke is opgenomme tijdes un optraeje in Nuujdörp (Sjtein). René besjlut in jannewarie 2002 KP weer te verloate en in oktwoaber/november van dat joar weurt de twedde cd ("Kwekkerdekwek, lek mien tesj") opgenomme. Op dees cd sjteit o.a. ut nummer D.V.M. (Deere Verveur Maneere) dat gesjreve is veur de Deerebesjerming i.v.m. hun aksie "Vjètransport".
Eind 2003 besjloete Huub en Robert beide KP te verloate en venge ze in Bart (zang) en Eddy (drum) gooj vervangers womit ze in 2006 hunne demo "10 Joar KP" oetbrenge. In 2007 deit Maddy verdeenstelök es Tröttrut deens bie KP. In 2012 maak KP unne korte mer heftige kriezes mit es Eddy dreig zien ongerbein te verleeze mer gelökkig is ut neet zwoa wiet gekomme. In juni besjlut Eddy onverwachs oet de band te sjtappe en noe zit KP effe zonger drummer. In augustus höbbe ze dan Roy es nuuje drummer weite te sjtrikke. :)
Konstepaasje maak un agressief mengsel van Metal & Punk woardoor se un leuke(?) band zuus wobie ut publiek jel vaak mit deit en raar fratse oethölt tijdes hun optraejes. Hun tekste goan euveral en nurges euver want KP is ontsjtange rondsj ut idee om mit völ plezeer meziek te make en dat idee volg dees band vandaag d'n daag nog ummer...
Konstepaasje (september 2012)
